Një person është arrestuar pasi një makinë u përplas në portat e Downing Street, rezidenca e kryeministrit të Britanisë së Madhe, Rishi Sunak, mbrëmjen e së enjtes.
Policia Metropolitane tha në një deklaratë se një makinë ishte “përplasur me portën e Downing Street në Whitehall” rreth orës 16:20.
“Oficerët e armatosur arrestuan një burrë në vendngjarje me dyshimin për dëmtim kriminal dhe drejtim të rrezikshëm”, shtoi forca e policisë së Londrës. “Ai është dërguar në paraburgim”.
Pamjet nga vendi i ngjarjes tregojnë makinën që kalon Whitehall – shtëpia e disa departamenteve kryesore qeveritare – dhe i afrohet hyrjes kryesore të Downing Street, e cila ruhet shumë nga policia. Duket se ngadalësohet përpara se të godasë portat.
Agjencia e lajmeve BBC dhe Press Association raportuan se Sunak ishte në Downing Street nr. 10 në kohën e incidentit, por më pas u largua për një vizitë të planifikuar paraprakisht. Pjesa e Whitehall rreth Downing Street Nr.10 tani është rihapur pasi u rrethua për një kohë të shkurtër nga policia.
“Nuk ka raportime për ndonjë të lënduar”, tha Met. “Hetimet janë në vazhdim për zbardhjen e rrethanave”.
Siguria është e kontrolluar fort rreth Westminsterit, skenës së një sulmi terrorist vdekjeprurës në parlamentin e Mbretërisë së Bashkuar në 2017.
Gazeta Shqiptare
